«Ғажайып алтын күз» көрмесі
Мақсаты: Балаларды күз мезгілімен таныстыру, табиғаттың әсемдігін сезіндіру, ата-аналармен бірлескен шығармашылық жұмыстарды тамашалау.
Көрнекіліктер: Күзгі жапырақтар, жемістер, көкөністер, асқабақ, себеттер, ата-аналар жасаған күзгі қолөнер бұйымдары.
1,Армысыздар, құрметті ата-аналар, қонақтар! Бүгінгі «Күзгі ғажайыптар» атты көрмемізге қош келдіңіздер!
Күз келді, айнала алтын түске боялды. Ағаштардан жапырақтар түсіп, бақшамыз түрлі түске енді. Бүгін біздің кішкентай бүлдіршіндеріміз күздің әсемдігін бірге тамашалайды.
- Күз ханшайымының келуі
Күз ханшайымы қолына жапырақтар мен себет ұстап кіреді.
Күз ханшайымы:
Сәлеметсіңдер ме, балақайлар! Мен сендерге алтын жапырақтар мен тәтті жемістер ала келдім. Күз мезгілін жақсы көресіңдер ме?
Балалар: Иә! Тәрбиеші балаларға түрлі түсті жапырақтар таратады.
Тәрбиеші:
Жел соқты, жел соқты,
Жапырақтар тербелді.
Сары жапырақ, қызыл жапырақ,
Жерге қарай төгілді!
Балалар жапырақтарды жоғары көтеріп, айналдырып, себетке жинайды.
- Күзгі көрмені тамашалау
Тәрбиеші ата-аналар дайындаған қолөнер бұйымдарын көрсетеді.
Тәрбиеші:
Балалар, қараңдаршы, қандай әдемі бұйымдар! Мынау — асқабақ, мынау — сәбіз, ал мынау — күзгі жапырақтардан жасалған әсем жұмыс.
Ата-аналарымыз бен балаларымыз күзгі көрмеге ерекше еңбектерін әкеліпті. Қолөнер бұйымдарын бірге тамашалайық!
Күз ханшайымы:
Мынау не, балалар?
Балаларға жеңіл сұрақтар қойылады:
Мынау не? — Алма.
Алманың түсі қандай? — Қызыл.
Мынау не? — Асқабақ.
Күзде жапырақтар қандай түске боялады? — Сары.
(2 жастағы балаларға жауапты міндетті түрде айтқызудың қажеті жоқ. Көрсету, қайталау және қимылдау жеткілікті.)
Күз ханшайымы:
Жарайсыңдар, балақайлар! Сендер өте ақылды екенсіңдер!
- Би: «Күзгі жапырақтар»
Көңілді әуен қосылады. Балалар қолдарындағы жапырақтармен жеңіл қимылдар жасайды:
Қолдарын жоғары көтереді.
Оңға-солға тербеледі.
Айналады.
Тәрбиешімен бірге қол шапалақтайды.
- Қорытынды
Күз ханшайымы:
Алтын күзім келді міне,
Жапырақтар төгілді.
Балақайлар қуанып,
Күзгі әнге бөленді!
Тәрбиеші:Құрметті ата-аналар, көрмемізге атсалысып, балаларымыздың шығармашылығын қолдағандарыңызға көп рақмет! Әр шаңыраққа молшылық, береке және қуаныш тілейміз!
Кішкентай бүлдіршіндеріміздің әрбір қадамы қуанышқа толы болсын!
Баршаңызды «Алтын күз» мерекесімен құттықтаймыз!
